Народнаму пісьменніку Беларусі Васілю Быкаву апошнія гады жыцця наканавана было правесці за мяжой, у тым ліку ў Нямеччыне, а таксама ў Чэхіі па асабістым запрашэнні прэзідэнта Вацлава Гавела. Удалечы ад Радзімы былі напісаныя многія быкаўскія шэдэўры кароткай прозы — апавяданні, прысвечаныя Слуцкаму збройнаму чыну 1920 года, трагічным падзеям Другой сусветнай вайны, сталінскім рэпрэсіям. У гэтым жа шэрагу прыпавесці і літаратурныя казкі, у якіх Быкаў сягае вышынь у асэнсаванні адвечных ісцін, б’е ў звон, каб вывесці суайчыннікаў з сацыяльнага здранцвення.